" />
- فيلم Locke

فيلم Locke

الفيلم كله بتدور أحداثه داخل سيارة بيقودها صاحبها فى رحلة مصيرية بتغير حياته تماما .. تجربة سينمائية مختلفة و مميزة جدا من نوعية أفلام المكان الواحد اللى باحبها جدا ، بيقدمهالنا المخرج و الكاتب "ستيفن نايت" فى مثال رائع لكيفية عمل فيلم قوى فكرته جميلة و ناجح فنيا و ممتع جدا بأقل الإمكانيات .. 1 min


132
114 shares, 132 points

Hits: 92

الفيلم كله بتدور أحداثه داخل سيارة بيقودها صاحبها فى رحلة مصيرية بتغير حياته تماما .. تجربة سينمائية مختلفة و مميزة جدا من نوعية أفلام المكان الواحد اللى باحبها جدا ، بيقدمهالنا المخرج و الكاتب “ستيفن نايت” فى مثال رائع لكيفية عمل فيلم قوى فكرته جميلة و ناجح فنيا و ممتع جدا بأقل الإمكانيات ..

“ايڤان لوك” مهندس و مدير بناء فى شركة مقاولات كبيرة ، متزوج بقاله 15 سنة و عنده ولدين .. فى إحدى الليالى بعد يوم عمل شاق قضاه فى التجهيز لعملية صب الخرسانة و البناء الكبرى اللى هاينفذها تانى يوم الصبح و اللى هاتعتبر أكبر عملية فى تاريخ الشركة و فى حياته المهنية كلها ، و هوا بيستعد للعودة للبيت فى الليلة دى عشان يتفرج على مباراة كرة القدم لفريقه المفضل فى الدورى الإنجليزى كالعادة مع أولاده و زوجته ، فجأة بتجيله مكالمة تليفون بتخليه يركب عربيته ال BMW و يسافر بيها من برمنجهام إلى لندن فى رحلة هاتشقلب حياته تماما و تهد كل اللى عاش طول عمره يبنيه ..

مكالمة التليفون دى كانت من واحدة ست قضى معاها لوك ليلة من 7 شهور كانت نتيجتها انها أصبحت حامل ، دى كانت الغلطة الوحيدة فى حياته و كان بالفعل ندمان عليها و واخد على نفسه عهد انه يكون موجود فى لحظة ولادة الطفل ده و ما يتهربش زى ما ناس كتير بتعمل فى المواقف اللى زى دى ، و كان ناوى يعرف زوجته برضو قبل معاد الولادة اللى كان المفروض لسه فاضل عليه شهرين ، لكن قدره ان الطلق جه للست فى الشهر السابع و بالتحديد فى ليلة فى غاية الأهمية بالنسبة للوك على المستوى الأسرى و المهنى زى دى ، فابيسيب كل حاجة و بيركب عربيته و بيسافر فى اتجاه المستشفى اللى هاتولد فيها الست فى لندن ..

أثناء الطريق لوك بيعمل مكالمات كتير من خلالها بنمسك خيوط القصة و بنتابع الأحداث و من خلالها بنعرف إجابات الأسئلة اللى بتدور فى دماغنا كمشاهدين .. احنا مش بنشوف غير لوك فى السيارة طول الفيلم و باقى الشخصيات بنسمع أصواتهم فقط من خلال حوارهم معاه فى التليفون .. بنشوفه و هوا بيعترف لزوجته اللى كانت جايبة الشراب المفضل بتاعه و محضرة السجق اللى بيحبه و لابسة التيشرت بتاع الفريق كمان و مستنياه ، و بنشوفه و هوا بيصدم مديره و بيعرفه انه مش هايقدر يكون موجود الصبح أثناء تنفيذ عملية صب الخرسانة و هوا متأكد ان دى حاجة هاتتسبب فى رفده و طرده من الشركة لكن رغم كده بياخد عهد على نفسه انه يتابع مع المساعد بتاعه على التليفون سير العملية خطوة بخطوة لحد ما يطمئن انها تمت بنجاح ، و بنشوفه و هوا بيتكلم مع أولاده اللى بينقلوله أخبار و أحداث الماتش و مستغربين جدا ازاى أبوهم مش متحمس و مش بيتابع الماتش بشغف كعادته دايما ..

ساعة و نص هى المسافة لحد المستشفى و هى مدة مباراة كرة القدم تقريبا و هى مدة الفيلم برضو .. ساعة و نص بعدها هايصبح لوك بلا وظيفة ولا زوجة ولا بيت ، بسبب غلطة واحدة فقط .. لما بيقول لمراته دى كانت مرة واحدة بس فى حياتى بتقول له الفرق بين مرة واحدة و ولا مرة هو العالم كله ، هو الفرق بين الخير و الشر .. ساعة و نص بنتنقل فيها مع لوك عبر التليفون بينه و بين الست اللى بتولد فى المستشفى و بين زوجته و أولاده و بين المساعد بتاعه فى الشغل و بين ناس تانيين غيرهم ، بيحاول يصلح الأمور و بيحاول ينقذ ما يمكن إنقاذه ، بيحاول انه يبدو متماسك و مسيطر على الأمور كعادته و كطبيعته دايما لكن جواه زلازل و براكين .. مع الوقت كل شوية بنعرف معلومات أكتر و بتظهر أبعاد نفسية و فلسفية و أخلاقية أكبر و أكبر و بنفهم سر إصرار لوك العجيب على المضى فى تنفيذ قراره دا مهما حصل و مهما كانت العواقب ، عايز يثبت ايه بالظبط و لمين ؟ و هل القرار دا يستاهل التضحية و الخسارة الكبيرة اللى هايتعرض لها دى ولا لأ؟

عجبنى أوى الربط المستتر بين وظيفة لوك كرجل بناء و بين حياته ، زى فى أحد المشاهد أو المكالمات مع المساعد بتاعه بيأكد معاه على مراجعة نوعية الخرسانة اللى جاية بكرة و ازاى لازم كلها تكون من أعلى درجة و ان لو فى جزء صغير بس فى المبنى اتعمل بخرسانة ضعيفة غير متماسكة هاتبدأ فى أسرع وقت تظهر الشقوق و الشروخ فى الجزء دا و هاتنتشر فى المبنى كله لحد ما ينهار ..
و عجبنى الواقعية فى الفيلم و عدم فرض نهاية سعيدة أو حلول سحرية للموقف الصعب المعقد اللى اتحط فيه لوك أو اللى حط نفسه فيه بنفسه ، و إنما هى الحياة بتعقيداتها و المستقبل المجهول و إنما لوك مجرد واحد عادى جدا زيه زى أى حد تانى بيحصل معاه كده.

أداء استثنائى عظيم للنجم توم هاردى و دور مختلف تماما عن معظم أدواره اللى قدمها قبل كده ، دور أتاحله فرصة كبيرة لإبراز إمكانياته و موهبته بشكل يستحق الإشادة و التكريم ، و نقدر نقول انه كان عامل رئيسى جدا فى نجاح الفيلم و خروجه فى الصورة الفريدة دى .. لكن كمان باقى الممثلين اللى شاركوا من خلال أصواتهم بس كانوا فى قمة البراعة و التمكن ، و يخلونا دايما منصتين باهتمام بنحاول نستحضر صورتهم و نتخيل بيعملوا ايه و نكوّن انطباع عن كل شخصية من صوتها و من طريقة كلامها و بنتأثر بكل كلمة بتتقال ، كأننا بنسمع مسرحية إذاعية درامية مؤثرة جدا لمجموعة من النجوم الكبار فى الراديو ..

فيلم لوك Locke للمخرج و الكاتب الموهوب ستيفن نايت من إنتاج سنة 2013 ، تقييمه العام 7.1 على IMDB و تقييمه النقدى 91% على Rotten Tomatoes .. تجربة سينمائية مميزة و رحلة واقعية نفسية رائعة أنصح بمشاهدتها بشدة .. الفيلم مش طويل مدته 85 دقيقة بس و أتمنى اللى ماشافهوش يشوفه و نتناقش فيه مع بعض ..

بقلم Haytham Ahmed


اعجبك الموضوع ؟ شاركه مع اصدقاؤك

132
114 shares, 132 points
عالم تانى هو بوابة علمية ثقافية تاريخية لاثراء للفرد والمجتمع العربي. القائمين على المحتوى مجموعة من الباحثين وهواة المعرفة لنشر العلم والثقافة والتاريخ بمختلف وسائطه. عالم تانى مجتمع ثرى بالمعلومات والأبحاث, ليس ذلك فحسب, بل وايضا بالمواد الأدبية كالشعر والروايات وعالم السينما, لنقدم للفرد والمجتمع العربى وجبة دسمة وغنية بالعلوم والفنون والمعرفة فى اّن واحد.

0 Comments

اختر نوع المقال
اختبارات الشخصية
مجموعة من الاسئلة التى تكشف جوانب الشخصية
فوازير واحاجى
مجموعة من الاسئلة لاختبار الذكاء والثقافة والمعلومات
تصويت
تصويت على موضوع معين
موضوع
موضوع او قصة او رواية
قائمة
قائمة
عد تنازلي
The Classic Internet Countdowns
قائمة مفتوحة
اضف موضوعك وقم بالتصويت على افضل موضوع
قائمة مرتبة
Upvote or downvote to decide the best list item
كومكس
ارفع صورك الخاصة لأنشاء كوميكس
فيديو
رفع فيديوهات من اليوتيوب او فيميو او من سطح المكتب
مقطع صوتى
رفع صوتيات من Soundcloud او Mixcloud
صورة
رفع صور تعبر عن موضوع معين
صورة متحركة
رفع صور متحركة
شكرا للمشاركة