نجوم منذ الطفولة

بقلم: Haytham Ahmed فى نجوم كبار بدءوا مشوارهم الفنى و هما شباب و فى نجوم بدءوا و هما كبار ، لكن قليلين اللى بدءوا و هما أطفال و استحقوا نجوميتهم عن جدارة من صغرهم بأدوار عظيمة أظهرت موهبتهم و خلدت أساميهم فى ذاكرتنا من بدرى. فى التقرير البسيط ده اخترت ٣ من أقوى الأدوار السينمائية اللى أداها أطفال و كان كل دور فيهم تذكرة للعبور إلى عالم النجومية و الوصول لقلوب الناس من أقصر و أسرع الطرق .. أو بالبلدى كده كانت وش السعد و فتحة خير عليهم :) 1 min


105
520 shares, 105 points
نجوم منذ الطفولة

 

نجوم منذ الطفولة
Haytham Ahmed
January 27 at 12:22am
#سينما_سطور
نجوم منذ الطفولة
============
فى نجوم كبار بدءوا مشوارهم الفنى و هما شباب و فى نجوم بدءوا و هما كبار ، لكن قليلين اللى بدءوا و هما أطفال و استحقوا نجوميتهم عن جدارة من صغرهم بأدوار عظيمة أظهرت موهبتهم و خلدت أساميهم فى ذاكرتنا من بدرى.
فى التقرير البسيط ده اخترت ٣ من أقوى الأدوار السينمائية اللى أداها أطفال و كان كل دور فيهم تذكرة للعبور إلى عالم النجومية و الوصول لقلوب الناس من أقصر و أسرع الطرق .. أو بالبلدى كده كانت وش السعد و فتحة خير عليهم 🙂
**ناتالى بورتمان Natalie Portman فى فيلم “ليون المحترف” Leon The Professional
—————————————————–
الفيلم ده يعتبر من الكلاسيكيات السينمائية الرائعة ، له طابع مختلف و مميز جدا لا يمكن يتنسى .. مصنف رقم 28 فى قائمة أعظم الأفلام فى تاريخ السينما على موقع IMDB بتقييم 8.6 ..ناتالى بورتمان كانت أقوى عامل نجاح للفيلم بأداءها المبهر لدور بنت عندها ١٢ سنة اسمها ماتيلدا ، أهلها بيتقتلوا كلهم فى يوم واحد على ايد عصابة مخدرات بيقودها ضابط شرطة فاسد اسمه ستان (قام بدوره جارى أولدمان) .. ماتيلدا بتستنجد بجارهم ليون (قام بدوره چان رينو) قاتل مأجور محترف جدا بس عنده مبادئ ما بيقتلش نساء ولا أطفال و وحيد مقطوع من شجرة و ماعندوش أى أصدقاء غير النبتة بتاعته اللى بياخدها معاه فى كل مكان و بيسقيها و يراعيها طول الوقت ..
ليون بياخد ماتيلدا تحت جناحه و بيعلمها مهنة القتل و استخدام الأسلحة و بيساعدها فى الانتقام من اللى قتلوا أهلها .. بتنشأ بين ماتيلدا و ليون علاقة غريبة جدا و كل واحد فيهم بيأثر فى التانى و بيغير حياته بشكل جذرى .. البنت عفريتة فعلا مالهاش حل و بتقول كلام مايعرفش يقوله الكبار 🙂 .. و ليون جوّاه طفل ساذج و ناقصه حاجات كتير و معانى كتير فى حياته بتكملهاله ماتيلدا.

ستايل الفيلم فعلا مختلف و فريد جدا و ده بيبان فى طريقة تصوير المشاهد و أسلوب الحوار المميز و الموسيقى التصويرية الرائعة اللى دايما باحب أسمعها ، و الفضل فى ده للمخرج و الكاتب الفرنسى الرائع لوك بيسون Luc Besson اللى قدر يقدم لنا الوجبة الممتعة دى .. ناتالى بورتمان كانت مبهرة فعلا و يمكن دورها فى الفيلم ده لا يقل عن أدوار تانية عملتها و هى كبيرة زى دورها فى V for Vendetta و Black Swan .. چان رينو عمل دور ليون بشكل رائع جدا ، و كمان جارى أولدمان يعتبر من أحسن الممثلين اللى شفتهم بيعملوا دور ضابط الشرطة الفاسد السيكوباتى ، و المشهد بتاعه و هو بيقتل أسرة ماتيلدا مع الموسيقى التصويرية فى الخلفية يعتبر من المشاهد الكلاسيكية الخالدة فعلا .. ده ڤيديو للمشهد.

الفيلم كان من انتاج سنة ١٩٩٤ اللى تعتبر سنة الأفلام العظيمة 🙂 .. نزل فيها فيلم The Shawshank redemption و فيلم Forrest Gump و فيلم Pulp fiction و فيلم Lion King و غيرهم .. و الفيلم ده يستحق انه يتحط وسط المجموعة دى عن جدارة طبعا.

**كريستيان بيل Christian Bale فى فيلم امبراطورية الشمس Empire of the sun
—————————————————————————
اللى يشوف الفيلم ده يقدر يفهم سر الحيوية و التفانى اللى دايما بنشوفه فى أداء كريستيان بيل ، كان وقتها لسه طفل عنده ١٣ سنة و عمل دور فى الفيلم ده من أقوى أدواره و كان يعتبر مفتاح تألقه و نجوميته ..
الفيلم بتدور أحداثه أثناء الحرب العالمية التانية لما اليابان احتلت الصين و بالتحديد فى شنغهاى أخدوا أسرى من الإنجليز و الأمريكان اللى كانوا عايشين هناك ، و كان من ضمنهم ولد إنجليزى صغير اسمه جيم من أسرة غنية اتفرق عن أهله وسط الزحمة و الغزو اليابانى و اتاخد فى معسكر الأسرى ..

رغم قلة الأكل و انتشار المرض و العدوى و المعاملة المهينة جيم قدر انه يصمد , و كمان بخفة و سرعة حركته و نشاطه و حيويته و فضوله و حبه للتعلم قدر انه يأسس شبكة من التبادلات و المقايضات و الخدمات داخل المعسكر و كمان كان بيساعد ناس كتير كبار فى السن و غلابة و اتعلم اللغة اليابانية و أتقنها كمان 🙂 ..
الفيلم مأخوذ عن قصة أحداثها حقيقية و إخراج العبقرى ستيفن سبيلبرج , و بطولة جون مالكوفيتش و ميراندا ريتشاردسون , بالإضافة طبعا لكريستيان بيل الصغير اللى أظهر موهبته بقوة من خلال أداء الدور الرئيسى و المحورى للولد الإنجليزى جيم فى الفيلم.

الفيلم انتاج سنة 1987 و حصل على تقييم عام 7.8 على IMDB و يعتبر من أفلام ستيفن سبيلبرج الرائعة اللى مش منتشرة أوى.

**كلوى جريس موريتز Chloe Grace Moretz فى فيلم Kick-Ass
———————————————————————-
فيلم لذيذ جدا من أفلام الكوميكس عجبتنى فكرته أوى , بيتكلم عن ولد مراهق فى المدرسة اسمه ديف ليزيسكى بيقرر انه يبقى سوبرهيرو رغم انه ماعندوش أى قوة خارقة ولا أى موهبة غير موهبة انه بيعدّى من قدام البنات زى الهوا مافيش ولا واحدة بتعبّره 😀 .. بس هو طيب فعلا و كان بيسأل ليه ماحدش حاول انه يبقى سوبرهيرو حقيقى و ينزل يساعد المحتاجين و الضعفاء .. اشترى بدلة سوبرهيرو خاصة من ع النت و سمّى نفسه KIck-Ass و بدأ فعلا ينزل الشارع يساعد الناس , و فى مرة حب يحوش عن واحد بينضرب من عصابة فى الشارع فأكل علقة جامدة أوى بس الناس كانت واقفة تتفرج و تصوّر بموبايلاتها (بدل ما يحوشوا أو يساعدوا) , و الفيديو نزل على النت و انتشر و ناس كتير أعجبوا بشجاعته جدا و بدءوا يتخذوه مثل أعلى و فى ناس كمان بدأت تقلده و تتنكر فى زى سوبرهيرو عشان تنزل تساعد الناس ..

الأحداث بتتطور و بيظهر فى الصورة 2 سوبرهيرو حقيقيين عبارة عن أب و بنته الصغيرة .. الأب دامون مكريدى (قام بدوره نيكولاس كيدج) كان ضابط شرطة محترف سابق , عايش عشان ينتقم من العصابة اللى قتلت زوجته و أم بنته الصغيرة اللى عندها 10 سنين ميندى مكريدى (اللى هى بطلتنا الصغيرة كلوى موريتز) .. الأب سمّى نفسه Big Daddy و سمّى بنته الصغيرة Hit Girl اللى دربها و علمها و خلاها تقدر تغلب أقوى المقاتلين بسهولة .. بيلتقوا ب Kick-Ass و بيتحدوا مع بعض فى مواجهة زعيم العصابة اللى طلع ابنه زميل Kick-Ass فى المدرسة و قرر هو كمان يبقى سوبرهيرو بس شرير ..

الفيلم انتاج سنة 2010 و متاخد طبعا من الكوميكس الأصلية التابعة لشركة مارفل , للمخرج الرائع ماتيو فون , و بطولة نيكولاس كيدج و آرون تيلور جونسون و مارك سترونج و طبعا كلوى موريتز .. و صدر جزء تانى ليه سنة 2013 برضو حلو لكن بتغلب عليه النزعة التجارية شوية.

كلوى موريتز كانت أكتر حاجة ممتعة فى الفيلم من خلال دور Hit Girl .. زى العسل عندها قبول كبير جدا و تتحب بسهولة .. هى مواليد 1997 و لسه صغيرة دلوقتى لكن أتوقع لها مستقبل باهر جدا الفترة الجاية و ممكن توصل لنجومية زى ناتالى بورتمان و أكتر.

————————————————————————–
طبعا فى أمثلة تانية حلوة كتير غير التلاتة دول زى هالى أوزمنت Haley Osment و أدواره فى أفلام Pay it forward و The Sixth sense و A.I كانت كلها هايلة طبعا بس حرق نفسه بعدها و ماعملش حاجة لما كبر , و نفس الكلام برضو زى داكوتا فانينج Dakota Fanning و دورها فى فيلم War of the worlds , و الولد ماكولى كالكين بتاع Home Alone , و غيرهم كتير لكن التلاتة دول كانوا أكتر أدوار عجبتنى بصراحة .. و يا ريت لو حد عنده اقتراحات أو ترشيحات تانية من نفس النوع نتلاقى ذهنيا فى التعليقات 🙂


اعجبك الموضوع ؟ شاركه مع اصدقاؤك

105
520 shares, 105 points
عالم تانى هو بوابة علمية ثقافية تاريخية لاثراء للفرد والمجتمع العربي. القائمين على المحتوى مجموعة من الباحثين وهواة المعرفة لنشر العلم والثقافة والتاريخ بمختلف وسائطه. عالم تانى مجتمع ثرى بالمعلومات والأبحاث, ليس ذلك فحسب, بل وايضا بالمواد الأدبية كالشعر والروايات وعالم السينما, لنقدم للفرد والمجتمع العربى وجبة دسمة وغنية بالعلوم والفنون والمعرفة فى اّن واحد.

0 Comments

شكرا للمشاركة