" />

فيلم فارجو

Haytham Ahmed بقلم فى أفلام كده تخليك تقع فى غرام الشخصيات اللى فيها من كتر ما هى مرسومة و مكتوبة بعبقرية و إتقان و من كتر حلاوة و روعة أداءها .. الفيلم ده من أكتر الأفلام اللى قدرت تعمل كده و قدرت تقدم لنا شخصيات تتحفر فى الذاكرة عمرها ما تتنسى و أخص بالذكر تحديدا الشخصية اللى عملتها "فرانسيس ماكدورماند" و فازت عنها بجائزة الأوسكار بكل جدارة و استحقاق. 1 min


94
410 shares, 94 points
فيلم فارجو - فيلم فارجو
فيلم فارجو - فيلم فارجو
Haytham Ahmed
December 30 at 1:39am
#سينما_سطور
فارجو #Fargo
===============
فى أفلام كده تخليك تقع فى غرام الشخصيات اللى فيها من كتر ما هى مرسومة و مكتوبة بعبقرية و إتقان و من كتر حلاوة و روعة أداءها .. الفيلم ده من أكتر الأفلام اللى قدرت تعمل كده و قدرت تقدم لنا شخصيات تتحفر فى الذاكرة عمرها ما تتنسى و أخص بالذكر تحديدا الشخصية اللى عملتها “فرانسيس ماكدورماند” و فازت عنها بجائزة الأوسكار بكل جدارة و استحقاق.
الفيلم من نوعية أفلام الجريمة و الكوميديا السوداء من كتابة و إخراج و إنتاج الأخوين “كوين” الرائعين المتميزين جدا .. بتدور أحداثه فى إحدى القرى أو المدن الصغيرة الهادئة جدا فى ولاية منيسوتا شمال الولايات المتحدة ..
جيرى لونديجارد مدير معرض سيارات بائس مديون بيحلم ينفذ مشروعه الخاص اللى محتاج رأس مال 750 ألف دولار , حماه اللى هو صاحب معرض أو شركة السيارات رفض يساعده أو يمول المشروع فراح اتفق مع اتنين مجرمين عشان ييجوا يخطفوا مراته و يطلبوا فدية عشان يضطر حماه يدفعها طبعا لإنقاذ بنته .. الخطة انه يتفق مع الخاطفين على 80 ألف دولار و يطلب من حماه مليون دولار فدية يدفع منهم للخاطفين و ياخد هو ال 920 ألف دولار .. خطة بسيطة و سهلة لكن مع التنفيذ الأمور فلتت و الخطة اتعقدت و باظت منه و بقت كارثة.الخاطفين راحوا خطفوا مراته من البيت فعلا بس و هما راجعين قتلوا ضابط الشرطة بتاع الدورية لما وقفهم فى الطريق و حب يتحقق من شخصياتهم , و كمان قتلوا اتنين كانوا معديين بالصدفة بعربيتهم و شافوا اللى حصل ..
من هنا بنبدأ نشوف بطلة الفيلم الحقيقية “مارج أندرسون” رئيسة الشرطة فى المدينة الصغيرة دى و اللى كانت حامل 🙂 , بتصحى فى البيت على تليفون الساعة 3 قبل الفجر بيبلغوها بالجريمة اللى حصلت فابتقوم عشان تلبس و تنزل جوزها قال لها استنى ماتنزليش كده على لحم بطنك هاقليلك بيضتين 😀 , قعدت و فطرت مع جوزها فعلا و الصبح طلع عليهم و بعدين خرجت من البيت و رجعت بعد ثوانى بتقول لجوزها معلش يا حبيبى عربية الدورية نايمة و محتاجة زقة 😀 .. المشهد ده لوحده كده يفطس من الضحك و يدخل اللى بيتفرج فى الموود بتاع الفيلم بقوة 😀 موود الزمن الجميل و الحياة البسيطة الهادية جدا فى المنطقة دى من العالم .. مارجى بتوصل لمسرح الجريمة و بنكتشف هنا إنها ذكية و لمّاحة جدا و عندها فراسة و سرعة بديهة , بسرعة حللت المشهد صح و استنتجت كل اللى حصل بالظبط و بدأت التحقيق بتاعها و سعيها و مطاردتها للجناة و كشفها لخيوط الجريمة.

الفيلم بيبين مدى عبثية الحياة و ازاى كل البلاوى دى ممكن تحصل فى المكان المنسى المعزول عن العالم ده و ماحدش يسمع بيها أو يهتم و الحياة تستمر عادى .. عجبنى أوى تصوير المكان ببراعة خاصة مع البرد و الثلج و الملابس الشتوية فى المكان ده فى الشمال ادى للفيلم طابع مميز و مختلف جدا .. كمان عجبنى أوى البراعة فى تصوير بساطة الناس و لهجتهم المميزة و أد ايه اهتماماتهم فى الحياة بسيطة جدا و تحس بصدق مارجى فى آخر الفيلم و هى مستغربة من كل الجرايم اللى حصلت دى من أجل حفنة من المال.

الشخصيات فى الفيلم فعلا كانت كلها متميزة و معمولة باحترافية و اتقان شديد .. الاتنين الخاطفين كانت شخصياتهم مميزة جدا , واحد كان قصير غريب الأطوار و مش بيبطل كلام و قام بدوره الممثل الرائع “ستيف بوسيمى” , و التانى كان طويل ما بيتكلمش خالص تقريبا إلّا فى أضيق الحدود و على طول مبرّق و متنّح و شخصيته فيها حتة السفاح الطفولى أو المريض نفسيا و قام بدوره ببراعة برضو “بيتر ستورمير” .. “ويليام ميسى” كمان عمل دور جيرى لوندجارد صاحب الخطة فى الفيلم و قدر يجسد شخصية الرجل المديون البائس الفاشل و المخادع بشكل رائع اترشح عنه لجايزة الأوسكار أحسن ممثل .. و نجمة الفيلم بقى “فرانسيس ماكدورماند” اللى قامت بدور رئيسة الشرطة الحامل القروية اللى زى ما بنقول عندنا كده بنت البلد الجدعة الناصحة الذكية , تحس زى ما تكون خالتك بتمثل فى الفيلم 😀 , من الشخصيات السينمائية الفريدة اللى شفتها و هى أكتر حاجة حببتنى فى الفيلم , أداء رائع و طبيعى جدا استحقت عنه الأوسكار عن جدارة .. و الفضل كله فى الآخر بصراحة يحسب للأخوين “كوين” Joel Coen و Ethan Coen و دايما كل أفلامهم مميزة جدا و دايما بيكتبوا و يخرجوا و ينتجوا افلامهم بنفسهم.

الفيلم انتاج سنة 1996 تقييمه العام 8.1 على IMDB و تقييمه النقدى عالى جدا 94% على موقع Rotten Tomatoes و اترشح ل 7 جوايز أوسكار حصل منهم على جايزتين عن أفضل ممثلة و أفضل سيناريو .. من روائع الأفلام فعلا و أنصح بمشاهدته بشدة

ده لينك مترجم للى حابب يشوف الفيلم
online.cima4u.tv/?p=8347


اعجبك الموضوع ؟ شاركه مع اصدقاؤك

94
410 shares, 94 points
عالم تانى هو بوابة علمية ثقافية تاريخية لاثراء للفرد والمجتمع العربي. القائمين على المحتوى مجموعة من الباحثين وهواة المعرفة لنشر العلم والثقافة والتاريخ بمختلف وسائطه. عالم تانى مجتمع ثرى بالمعلومات والأبحاث, ليس ذلك فحسب, بل وايضا بالمواد الأدبية كالشعر والروايات وعالم السينما, لنقدم للفرد والمجتمع العربى وجبة دسمة وغنية بالعلوم والفنون والمعرفة فى اّن واحد.

0 Comments

شكرا للمشاركة