الملحمة الوثائقية “قصة البشرية – قصتنا جميعا” – “Mankind – The Story of All of Us”

1 min


193
1.4k shares, 193 points
تاريخ البشرية - the history of mankind
تاريخ البشرية - the history of mankind

Haytham Ahmed

الملحمة التليفزيونية الوثائقية الرائعة “قصة البشرية – قصتنا جميعا” Mankind – The Story of All of Us “

وسط فوضى كوكب لا يرحم .. أغلب أنواع الكائنات الحية ستفشل فى صراع البقاء .. لكن لنوع واحد ستقع كل القطع فى المكان المقدر لها و ستفتح مجموعة من المفاتيح طريقا للبشرية كى تنتصر. هذه قصتنا .. قصتنا جميعا” دى مقدمة السلسلة التليفزيونية “قصة البشرية” اللى فى 12 حلقة تليفزيونية بتشرح قصة البشرية من أول وجود الحياة على كوكب الأرض لحد دلوقتى المتعة انك و انت بتتفرج بتربط تاريخ البشرية كله ببعضه كأنه شريط بيعدى قدامك .. امبراطوريات بتنشأ و تزدهر و تكون حضارات و بعدين تنهار أو تندثر عشان تنشأ مكانها امبراطوريات و حضارات أخرى و هكذا على مر العصور .. أحداث بتحصل أو أفكار بتتولد فى مكان من العالم بيوصل تأثيرها إلى أماكن تانية على بعد آلاف الأميال مشاهد تصوير باحترافية شديدة و تقنية عالية جدا للأحداث التاريخية والمعارك كأنك بتتفرج على فيلم تاريخى هوليوودى مش مجرد سرد للأحداث و خلاص .. الناس مكلفة يعنى 🙂

وجبة دسمة بمزيج رائع من التاريخ و الجغرافيا و علوم الكيمياء و الفيزياء و الطبيعة و الفضاء بوصف ممتع جدا غير ممل و غير مخل للأحداث على لسان الممثل القدير “چوش برولين” مع مجموعة رائعة من الباحثين و المؤرخين و العلماء و الخبراء الاستراتيجيين و العسكريين. بتعيش الأحداث فى كل زمان كأنك عايش مع الناس و بتحس فعلا بمعنى كلمة “الحاجة أم الاختراع” و بتشوف الحاجات اليومية العادية اللى انت ماتقدرش تستغنى عنها دلوقتى وقت اكتشافها أو اختراعها أو استخراجها و هى بتغير الحياة تماما فى وقتها زى الملح مثلا و دوره فى حفظ الغذاء من الفساد و التعفن فى زمن مافيش فيه تلاجات و لا تبريد. ::::::::

دى بعض لمحات من المحطات الفارقة فى تطور البشرية كفهرس مبسط للسلسلة: – * اكتشاف النار و أثره العظيم فى الحفاظ على البشرية. *زراعة أول بذور فى التاريخ بعدما كانت بتترمى كنفايات و ده كان أساس حضارتنا بالفعل بلا مبالغة. *بداية تأسيس أول مجتمع انسانى مايعرف بالقرية و ظهور معنى التملك و استحقاق الأرض اللى تعبت فيها و زرعتها و اللى لازم أدافع عنها و أحميها بكل قوة و اللى أدى طبعا لظهور أكبر عدو للبشرية و هو الانسان نفسه و ظهور أول ماعرف من الحرب و القتل من أجل الصراع على الموارد .. و اللى أدى بدوره لاستخدام و تطوير الأسلحة على مر العصور “للأسف دايما الحرب كانت هى اللى بتقود التكنولوچيا و الاختراعات و الاكتشافات”. *اختراع الكتابة لتدوين كل شئ و للتواصل و ادارة العمال و الموظفين. *ظهور الأسواق و بداية التجارة و مساهمتها فى التواصل و نشر الحضارات و الثقافات فى أنحاء الكوكب. *اكتشاف و استخراج الحديد و ما أدراك ما الحديد .. العصر الحديدى *طريق الحرير .. و ازاى الصين احتفظت بسر صناعة الحرير وحدها لمئات السنين مما أدى لتكوين الطريق التجارى العظيم اللى ربط الشرق بالغرب لأول مرة فى تاريخ البشرية *انتشار المسيحية من خلال الامبراطورية الرومانية *انتشار الاسلام و وصوله الى أوروبا *دور العلماء المسلمين العظيم فى الابتكار و احتضان العلم و الحفاظ عليه أثناء عصور الظلام و التخلف فى أوروبا *الڤايكينج و بدايتهم من شرق روسيا فى غزو و احتلال أكبر مدن أوروبا من ناحية البحر فى ايرلندا و انجلترا و فرنسا و أسبانيا و جلوسهم على عروش البلاد دى مع اعتناقهم للمسيحية ثم قيادة ما يعرف بالحروب الصليبية ضد المسلمين بعد كده *المغول و مهارتهم المذهلة فى استخدام الأحصنة فى القتال و التحرك بسرعة رهيبة جدا بمقاييس زمانهم حتى ان الجيش نفسه كان بيسبق أخبار قدومه *ظهور مرض الطاعون فى آسيا و ازاى وصل أوروبا عن طريق أحد قادة المغول فى أول حرب بيولوچية فى التاريخ … الطاعون حصد أرواح حوالى خمس تعداد سكان الأرض *اختراع البارود فى الصين و بداية استخدام البندقية كسلاح لتحرير الصين من المغول ثم انتقالها لأوروبا و دورها فى سقوط الأندلس. *فتح القسطنطينية على يد محمد الفاتح باستخدام المدفعية لأول مرة لقصف أسوار المدينة اللى كانت سر حصانتها و قوتها و صمودها *اكتشاف طريق رأس الرجاء الصالح فى محاولة الأوروبيين للوصول للشرق متحاشيين عبور القسطنطينية الاسلامية. *اختراع الآلة الكاتبة أو الطابعة و بداية عصر المعرفة و انتشار المعلومات بفضل طباعة آلاف النسخ من الكتب و وصولها لكل الناس بعدما كانت فقط فى أيدى مجموعة قليلة من الأغنياء *اكتشاف الأمريكتين .. و التعرف على الحضارات العظيمة اللى قامت على أرضها زى حضارة الإنكا و حضارة الأزتك *تجارة العبيد الأفارقة و استخدامهم فى أوروبا و أمريكا *الحرب الأهلية فى أمريكا *الثورة الصناعية فى أوروبا *اختراع المطاط و الكاوتشوك و النقلة العظيمة اللى عملها ثم الدخول فى عصر السرعة و الابتكار و الإمكانيات اللامحدودة للبشر فى تاريخنا المعاصر المعروف واللى تمكن فيه الانسان من الصعود للفضاء و الهندسة الوراثية و الاستنساخ و صناعة القنبلة الذرية و غيره و غيره .. و ده لينك لتحميل حلقات السلسلة مترجمة .. نزلها عندك و شوفها و مش هاتندم 🙂 http://uptobox.com/ifmoy8cd2cfu


اعجبك الموضوع ؟ شاركه مع اصدقاؤك

193
1.4k shares, 193 points
عالم تانى هو بوابة علمية ثقافية تاريخية لاثراء للفرد والمجتمع العربي. القائمين على المحتوى مجموعة من الباحثين وهواة المعرفة لنشر العلم والثقافة والتاريخ بمختلف وسائطه. عالم تانى مجتمع ثرى بالمعلومات والأبحاث, ليس ذلك فحسب, بل وايضا بالمواد الأدبية كالشعر والروايات وعالم السينما, لنقدم للفرد والمجتمع العربى وجبة دسمة وغنية بالعلوم والفنون والمعرفة فى اّن واحد.

0 Comments

شكرا للمشاركة