الحرب العالمية الثانية #44

1 min


121
680 shares, 121 points
الحرب العالمية الثانية
الحرب العالمية الثانية
الحرب العالمية الثانية #44
Amr Salah
April 17 at 9:03am
بسم الله الرحمن الرحيم الحرب العالمية الثانية……القصة الكاملة (الحلقة 44) حلقة النهاردة هنتكلم فيها عن نقطتين مهمين جداً و في غاية الخطورة….. الاولي….القطاع الجنوبي في الحملة علي روسيا…….ازاي؟ بص يا سيدي….مشكلة هتلر في غزو روسيا ان الخطة كانت مليانة بالاهداف الضخمة و المؤثرة لكن لم يتم الثبات علي هدف بحد ذاته….عدم الثبات علي هدفه كان عنصر مدمر…ازاي؟…احنا هنعرف ازاي لما نقف شوية عند الاهداف المسندة لقيادة الجبهة الجنوبية بروسيا…..الجبهة الجنوبية اللي كان القائد بتاعها فون رونشتد كان الهدف بتاعه هو اخضاع اوكرانيا بما فيها من محاصيل و موارد طبيعية…ماشي….بعد كدة كان الهدف بتاعه الوصول لحقول النفط الروسية في باكو بالقوقاز….ثم التوغل جنوباً من القوقاز حتي الوصول الي ايران و العراق ……الخطة دي كانت كفيلة بقلب التاريخ كله رأساً علي عقب……حقول النفط بباكو هي ثروة روسيا من النفط…ده اولاً….ثانياً وصول الالمان الي شمال ايران و العراق كفيل بخلع الوجود البريطاني من الشرق الاوسط باكمله……..الخطة دي كانت خطة شديدة الطموح…..سيظل الالمان يسعون خلف هذا الهدف الي ان يكتشفوا مدي صعوبة تحقيق هذا الهدف…….الهدف ده غلف كل عمليات الجيش الالماني باوكرانيا……هدف الالمان بالوصول الي القوقاز وضع مهمة جبارة علي اكتاف الجنرال فون مانشتين……مانشتين تم تكليفه باحتلال شبه جزيرة القرم كخطوة اولي لتحقيق هذا الهدف…….بكرة هنتكلم عن التفصيلات بتاعت العملية دي النقطة الثانية هي …الطريق الي بيرل هاربور( كيف يتم تزييف التاريخ بشياكة) قبل مانتكلم في الموضوع ده سيبك من اي اكليشهات قديمة عن تعرض الامريكيين للخديعة وان اليابانيين غدروا بيهم…….الامريكيين في الاغلبية العظمي من افلامهم السينمائية والوثائقية بيتكلموا ابتداءاً من يوم هجوم بيرل هاربور و مش بيجيبوا سيرة حاجة قبله….هنا كانت الخديعة و الفخ….الامريكيين احترفوا تزوير التاريخ بمنتهي الفن…..ازاي؟؟ الامريكيين مش بيكدبوا و لا بيختلقوا قصص عشان متقولش عليهم كذابين و وضاعيين…امال بيزيفوا ازاي؟؟؟ ….الامريكيين بيغفلوا ذكر تفاصيل مهمة مش بيجيبوا سيرتها …او يحكوا عن رد فعل وليس فعل…..يعني في بيرل هاربور مثلاً الامريكيين اغرقوا العالم بتفاصيل الهجوم الياباني البشع….بس اغفلوا سؤال مهم..” ليه اليابان هاجمت امريكا؟؟””…..الطريقة دي في كتابة التاريخ ساهمت الي حد بعيد في نشر الرواية الامريكيية للتاريخ …وباقي الرويات سيطالها النسيان حتي يبقي فقط ما قاله الامريكيين…..عاوز تتأكد اقرأ الرواية الامريكيية لحدث معين ثم اقرأ الرواية البريطانية لنفس الحدث…..هتلاقي تفاصيل كتير ظهرت…. مثلاُ…وثائقيات امريكية بتقول ان اليابان سارت في طريق الحرب مع امريكا مع تولي الجنرال توجو رئاسة وزراء اليابان….ده حقيقي….بس الوثائقيات البريطانية بتقولك ان توجو تولي بعد سقوط الحكومة التي سبقته لفشلها في التوصل لحل مع الادارة الامريكية….فشلت ازاي؟…لأن روزفلت تشدد معهم ورفض كل الحلول المقترحة…..التاريخ بيتم تزييفه كدة…بطريقة غير مباشرة …..باسقاط التفاصيل المهمة….في مصر مثلاً هو بيكلمك طول الوقت عن ان دبابات شارون كان بينها وبين القاهرة 60 كم ….بيشغلك بالنقطة دي….بيلهيك انك تسأله “..شارون خسر كام جندي ودبابةعشان يعمل كدة؟…يقدر يكمل قد ايه في حركته وهجومه؟؟ و السؤال الاهم…هل وضعه العسكري كان سليم؟؟””” ارجع و اقول اللي فات وجهة نظري ….انا هاحكي قصة ما قبل بيرل هاربور التفاصيل هي اللي هتقول احنا ظالمين الامريكيين ولا لا. احنا قلنا ان امريكا كانت بتساعد الصين ضد اليابان…وان الموضوع ده كان مقلق جداً لليابان…..كمان امريكا اوقفت تصدير كل المواد المستخدمة في صنع الاسلحة الي اليابان….امريكا بررت ده بأنها تمنع اليابان من الاعتداء علي جيرانها …في حين ان اليابان كانت تمتلك القوة العسكرية التي تمكنها من السيطرة علي جيرانها….بل ان منع تصدير المواد الخام الي اليابان دفع اليابان الي التفكير باحتلال الدول المجاورة….. واحدة واحد ة محتاجين نركز…… ليه امريكا كانت بتساعد الصين؟؟ ليه امريكا كانت حريصة علي جيران اليابان.؟؟؟ امريكا كانت بتساعد الصين لأن الصين كان سوق ضخم للسلع الامريكية …وجود اليابان في الصين يهدد الوجود الامريكي هناك…….امريكا لم تكن حريصةعلي جيران اليابان لأن الدول المجاورة لليابان كنت عبارة عن مستعمرات بريطانية و هولندية و فرنسية…….امريكا نفسها كانت عينها علي المستعمرات بجنوب شرق اسيا….لكن لم يكن لها نقاط تواجد قوية هناك…امريكا كانت عايزة تدخل بنظام الازاحة…تسيب حد يطرد الدول الاوروبيةعشان تدخل امريكا.. منذ الغزو الياباني لمنشوريا بالصين سنة 1937 وامريكا تعلم ان حربها لن تكون مع المانيا الهتلرية بل مع اليابان……امريكا و معها بريطانيا حاولوا انهاك اليابان بالصين……مع تدفق المساعدات العسكرية للصين عن طريق فيتنام …..اليابان ردت سنة1940 و استغلت سقوط فرنسا باحتلال فيتنام التي كانت مستعمرة فرنسية…….امريكا ردت بايقاف توريد الطائرات ومعدات الملاحة و المواد الخام لليابان. عدا النفط……كدة اليابان بتلف حوالين نفسها….ماشي..بس اشمعني امريكا ابقت علي توريد النفط لليابان…..امريكا شافت ان قطع توريد النفط لليابان قد يعد عمل استفزازي…. في مطلع 1941 قرر روزفلت نقل قاعدة الاسطول الامريكي من سان دييجو بساحل كاليفورنيا الي الفلبين…….ليه روزفلت عمل كدة؟؟ روزفلت رد بأنه تحذير لليابان من مغبة الاعتداء علي جيرانها…….وزير خارجية اليابان كرر اكثر من مرة ان جنوب شرق اسيا من حق اليابان بالفطرة الطبيعية للامور…..نقف شويةعند خطوة روزفلت……..روزفلت قال اننقال قاعدة اسطوله من كايفورنيا الي الفلبين لردع اليابان….طيب القاعدة بالفلبين كانت قوية؟؟؟…..لا كان تعدادها 30 الف جندي علي رأسهم دوجلاس ماك ارثر……ماك ارثر نفسه قال للقيادة انه لردع اليابان يلزمه 300 الف جندي….خد بالك من النقطة دي….طيب هل روزفلت كان راجل مدني ميفهمش في البحرية…….بالعكس في اوائل القرن العشرين كان مسئول عن تطوير البحرية الامريكية….امال ليه روزفلت نقل قاعدة الاسطول الامريكي للفلبين؟؟…ده سؤال يستحق التأمل خصوصاً وان العدد كان غير كافي …و ماك ارثر عبر عن ده…..الاغرب خطط الاستعداد للحرب في المحيط الهادي كان من ضمن تفاصيلها هو اخلاء قاعدة الفلبين اذا ما اندلعت الحرب….اذن انتواعارفين انها مالهاش لازمة… في يوليو 1941 (بعد غزوهتلر لروسيا)…امريكا منعت تصدير النفط لليابان.مرة واحدة كدة…وبعد ما كانوا بعتبروا ده عمل استفزازي قرروا فجأة انهم يأخدوا القرار ده……عايزتعرف منع تصدير البترول هيضر اليابان ولا..لا كفاية اقولك ان امريكا كانت بتورد 80% من النفط الذي تحتاجها اليابان….يعني منع النفط عن اليابان مش عمل استفزازي…ده اعلان حرب هل اليابان ذهبت للحرب مباشراً؟ لا…اليابان بدأت بالوسائل الدبلوماسية….لكن الامريكيين تشددوا في مطالبهم….طيب طلبوا ايه؟ امريكا طالبت بانسحاب اليابان من فيتنام و الصين …..ومطلب الانسحاب من الصين..امريكا كانت عارفة انه مهين لليابان ولن تقبل به…….في الوقت الذي حرمت امريكا اليابان من النفط…كانت المستعمرات الهولندية (باندونيسيا حالياً) غنية بالنفط……..جددت امريكا تحذيرها لليابان من الاعتداء علي الدول المجاورة قائلة ” ان امريكا قد اعدت خطوات تصعيدية اذا ما اقدمت اليابان علي غزو جيرانها…… تفصيل المشهد ببساطة……امريكا حرمت اليابان من اي مواد خام في الوقت الذي تري فيه اليابان الجميع يغترفون من مستعمرات جنوب شرق اسيا بلا رقيب…..واحد جعان حبسته جوا مطعم وقلتله لو اكلت هاقطع ايدك…….امريكااستمرت في الدبلوماسية ولكن بوضع شروط هي تعرف ان اليابان لن تقبلها (نقس اللعبة اتلعبت مع صدام حسين)…… اخطر ما في الموضوع ان رئيس وزراء اليابان كونيو كان واقع تحت ضغط سياسي داخلي مهول…..رئيس وزراء اليابان كان راجل معتدل خصومه هم القوميين المتطرفيين…لذلك الوصول لتسوية مع امريكا سيقوي موقفه امام حصومه…..رئيس وزراء اليابان كونيو عرض انسحاب اليابان من فيتنام و اجزاء من الصين فرفض الامريكيين…….. رئيس وزراء اليابان طلب مقابلة الرئيس روزفلت…….السفير الامريكي باليابان اوصي بالموافقة علي مقابلة رئيس وزراء اليابان كونيو لأن ذلك هو السبيل الوحيد لدعم حكومة كونيو المرنة و لحفظ السلام باقاليم المحيط الهادي…….روزفلت رفض مقابلة رئيس وزراء اليابان كونيو قبل انسحاب اليابان من الصين……انهارت الحكومة اليابانية….وصعد الي السلطة الجنرال توجو بحكومة عسكرية بالكامل من القوميين المتشددين… توجو القومي المتشدد عرض علي امريكا في 20 نوفمبر ان تنسحب اليابان من فيتنام و ان تتعهد بعدم الاعتداء علي جيرانها مقابل ايقاف دعم امريكا للصين و رفع العقوبات الاقتصادية عن اليابان……روزفلت رفض و اشترط انسحاب اليابان من الصين و توقيع مواثيق عدم اعتداء مع كل دول جنوب شرق اسيا… فلجأت اليابان الي القوة


اعجبك الموضوع ؟ شاركه مع اصدقاؤك

121
680 shares, 121 points
عالم تانى هو بوابة علمية ثقافية تاريخية لاثراء للفرد والمجتمع العربي. القائمين على المحتوى مجموعة من الباحثين وهواة المعرفة لنشر العلم والثقافة والتاريخ بمختلف وسائطه. عالم تانى مجتمع ثرى بالمعلومات والأبحاث, ليس ذلك فحسب, بل وايضا بالمواد الأدبية كالشعر والروايات وعالم السينما, لنقدم للفرد والمجتمع العربى وجبة دسمة وغنية بالعلوم والفنون والمعرفة فى اّن واحد.

0 Comments

شكرا للمشاركة