تجارب نفسية #6 – تأثير الهالة الشخصية


تجارب نفسية
تجارب نفسية
Haytham Ahmed
April 5 at 11:11pm
#تجارب_نفسية
الحلقة السادسة – تأثير الهالة الشخصية The Halo Effectكتير أوى بنخطئ فى الحكم أو بنتخدع فى أشخاص (أو أشياء أو كيانات) و من خلال شهرتهم فى مجال معين أو من خلال شكلهم أو طريقة كلامهم أو ملابسهم بنكوّن انطباع عام عن شخصياتهم أو مستوى ذكاءهم أو امكانياتهم الفعلية و قدرتهم على العمل الحقيقى و التنفيذ.* يعنى ايه اللى يخلينى مثلا أعتقد ان عبلة كامل بتفهم فى الطبيخ و السمنة و أعتقد ان رجاء الجداوى بتفهم فى غسيل الصحون أو ان أحمد السقا بيفهم فى العربيات و أروح أشترى المنتجات اللى بيسوقوها فى الاعلانات.
* ايه اللى يخلينى أسمع رأى الفنان عزت العلايلى أو الفنان نبيل الحلفاوى فى السياسة و أخد برأيهم و أعمل بيه .. يمكن عشان الراجل قعد يعرق و هو بيوسع فى خرم العسلية فى فيلم الطريق إلى إيلات؟ 😀
* طاب ليه ناس كتير بتحب تروح تتعامل مع اللى مربى دقنه أو عنده زبيبة صلاة فى رأسه لما تحب تشترى حاجة أو تتعامل تجاريا فى أى مجال, و بتستريح له أكتر من أى حد تانى ؟
* و ليه ناس كتير بتحب “أى فون” و ممكن تقف طوابير بالساعات تستناه أول مابينزل منه إصدار جديد رغم ان فى أنواع تانية امكانياتها أكتر فعلا و أرخص منه بكتير؟

دى بعض الأمثلة الحياتية لظاهرة نفسية اجتماعية فى غاية الأهمية منتشرة و متجذرة فى المجتمع اسمها “تأثير الهالة”.

العلماء عرفوا الظاهرة دى على انها نوع من الانحياز اللا إرادى Cognitive Bias اللى بيحصل عندنا لما انطباعنا العام الخارجى عن شخص أو حاجة معينة بيأثر على شعورنا أو تصورنا عن الصفات الشخصية الداخلية الأخرى للشخص أو الكيان ده.

يعنى الناس مثلا لما بتشوف حد شكله جميل أو جذاب و لابس كويس على طول بيتاخد انطباع ان الشخص ده أكيد لطيف و طيب و ذكى و اجتماعى .. على الأقل إلى أن يثبت العكس.
و العكس صحيح برضو ممكن مع حد تانى مظهره يبدو انه سئ, الناس بتاخد انطباع سلبى عنه فى كل حاجة .. برضو على الأقل إلى أن يثبت العكس.

الظاهرة دى بتحصل تلقائيا بشكل لا إرادى .. يعنى انت مثلا مش بتفكر بصوت عالى لما تشوف واحد شكله جذاب و لابس بدلة و مسرّح شعره كويس و حاطط برفان و تقول أكيد طالما شكله كده و لابس كده يبقى أكيد مستواه المادى و الاجتماعى عالى و أكيد اتعلم كويس و شغال فى مكان كبير و أكيد دمه خفبف و تلاقيه يعرف بنات كتير و الناس كلها بتحب قعدته و الكلام معاه .. لأ انت مش بتقول كل ده .. انت أصلا لو فكرت كده بصوت عالى ممكن تقف فى النص و تقول لأ طبعا مش ضرورى يكون كده يعنى .. انما الربط ده بيحصل بشكل تلقائى فى اللا وعى عندنا فى أجزاء من الثانية .. نوع من الاختصار و تبسيط الأمور Cognitive Shortcut بنحتاجه كتير لإصدار قرارات سريعة و التصرف طبقا ليه فى المواقف اليومية و التعامل مع الأشخاص و الحاجات اللى بنقابلها

علميا و نفسيا الناس دايما بتميل إلى تبسيط الأمور و البعد عن التعقيد و التفكير الكتير .. حلو أو وحش .. أبيض أو أسود .. طيب أو شرير .. ذكى أو غبى .. مافيش حاجة فى النص .. و اللى بيفكر كتير فى الحاجات دى بيتعب أوى فعلا.
____________________________

البداية:

عالم النفس “إدوارد ثورندايك” Edward Thorndike كان أول من سلط الضوء على الظاهرة سنة 1920 و تناولها بالبحث و الملاحظة و التجربة و أطلق عليها اسم تأثير الهالة اللى استوحاه من الهالات المضيئة اللى كانت بتحيط بوجوه القديسين فى اللوحات الدينية الكتيرة أوى اللى اترسمت فى العصور الوسطى فى أوروبا .. دليلا على القدسية و الطيبة و الصلاح .. مما أدى إلى ربط وجود الهالة دى فى ذهن الناس بكل الصفات الحميدة للشخص المحاط بالهالة, و من هنا كانت التسمية.

المهم .. الراجل ثورندايك ده راح لمجموعة من الضباط فى الجيش و طلب منهم تقييم الجنود بتوعهم من حيث الصفات الخارجية (زى الشكل و النظافة و الهندام و الصوت) و من حيث الصفات الشخصية أيضا (زى مستوى الذكاء و المهارات القيادية و التعاون و تحمل المسئولية)

لما جه يحلل النتائج لقى تناسب عجيب يكاد يصل الى حد التطابق مابين تقييم الضباط لصفات الجنود الخارجية و صفاتهم الشخصية ..
يعنى الجنود اللى كانت تقييماتهم عالية فى المظهر الخارجى و النظافة و الانضباط كانت تقييماتهم عالية برضو بالنسبة للذكاء و المهارات القيادية و تحمل المسئولية .. و العكس صحيح بالنسبة للجنود اللى كانت تقييماتهم الخارجية ضعيفة كانت تقييماتهم الشخصية ضعيفة برضو.

_____________________________

بعد كده علماء كتير جدا عملوا دراسات و تجارب كتير على الظاهرة و تناولوها من جوانب أخرى كتير و وسعوا مفهومها و استعمالاتها و تطبيقاتها لتشمل أيضا المنظمات و الشركات و الماركات العالمية كمان.
هاذكر تجربة على سبيل المثال للعالمين “لاندى” و “سيجال” سنة 1974 لدراسة أثر الهالة فى الحكم على مستوى الذكاء و الجودة الأكاديمية كالاتى:

– جابوا 60 طالب جامعى من الذكور و طلبوا منهم تقييم مجموعة من المقالات الأكاديمية كاتبها مجموعة من الإناث.
– المقالات دى فى الحقيقة بعضها جيد جدا و بعضها ضعيف جدا .. و بيتم تقسيمها الى 3 مجموعات:
مجموعة محطوط عليها صورة بنت شكلها جذاب (كمؤلفة أو صاحبة المقال يعنى) – و مجموعة تانية محطوط عليها صورة بنت شكلها غير جذاب خالص – و مجموعة تالتة مش محطوط عليها أى صورة.
النتيجة:
– بالنسبة للمقالات الجيدة جدا كانت تقييمات الطلاب للمقالات اللى عليها الصور الجذابة أعلى من المقالات اللى عليها الصور الغير جذابة و ان كان الفرق مش كبير أوى.
– أما بالنسبة للمقالات الضعيفة كانت تقييمات الطلاب للمقالات اللى عليها الصور الجذابة أعلى بكتير من اللى عليها الصور غير الجذابة و اللى من غير صور خالص.

و ده فعلا يفسر اللى بنشوفه كتير دلوقتى على الفيس بوك .. تلاقى بنت صورة البروفايل بتاعتها جميلة و جذابة و كاتبة حاجة رديئة أو عادية جدا حتى, بس تلاقى التفاعل معها و الإعجاب بكلامها كبير أوى .. أكتر من واحدة تانية كاتبة حاجة بنفس المستوى بس صورتها مش جذابة أو مش حاطة صورة أصلا .. و أكتر بكتير طبعا من ولد مموت نفسه و كاتب حاجة حلوة فعلا بس ماحدش عبره خالص 🙂
طبعا ده مش دايما بيحصل و مش مع كل الناس لكن ماحدش ينكر ان هو ده السائد.

____________________________

تأثير الشيطان The Devil Effect
و ده يعتبر المقابل بتاع تأثير الهالة .. و فى علماء بيعتبروه نوع من أنواع تأثير الهالة .. بس التأثير فيه بيكون سلبى .. اللى بيطلق عليه شيطنة الشخص أو الكيان .. يعنى بتشوف شخص متعور فى وشه مثلا فاييجى فى بالك على طول انه بلطجى بتاع خناقات و مشاكل و مش بعيد يكون سوابق أو مسجل خطر و لازم نبعد عنه ..
أو لما وسائل الإعلام تحب تشوه شخص أو زعيم أو دولة و تصور للناس ان الشخص ده شيطان شرير .. زى ما وسائل الاعلام فى أمريكا كانت بتعمل مع فيدل كاسترو و كوبا .. و زى برضو هيوجو تشافيز بتاع فنزويلا.

____________________________

طبعا الأمثلة العملية على تأثير الهالة فى حياتنا لا حصر لها ممكن نتعرض لبعضها بشئ من الإيجاز فى السطور التالية:

** أولا فى المجال السياسى و التاريخى:
– لو تأملنا فى تاريخنا الحافل بالإنقلابات العسكرية و الصراعات على الحكم هنلاقى دايما بيبقى فى قائد عسكرى أو حد الناس بتعتبره زعيم أو بطل قومى .. الناس بتعتقد دايما ان القائد أو الزعيم ده زى ماهو جيد فى الحياة العسكرية القيادية و القاء الأوامر و الانضباط أو الزعامة و القاء الخطابات, يبقى أكيد هايعرف يدير البلد و ينمى الاقتصاد و الزراعة و السياحة و يرفع مستوى المعيشة و كده .. ده طبعا بيبقى خلط كبير جدا لأن دى حاجات مالهاش علاقة ببعض خالص .. بس الخلط ده بيحصل بسبب تأثير الهالة الشخصية للقائد ده عند الناس .. و ده اللى بيودينا فى داهية دايما.

** ثانيا فى مجال التسويق و الاعلانات:
– الخبراء و العاملين فى مجال التسويق أدركوا تأثير الهالة من زمان و استغلوه باستخدام الهالة المحيطة بالمشاهير من الممثلين و المطربين و الرياضيين فى تسويق منتجاتهم فى الاعلانات زى الأمثلة اللى شفناها فى الأول خالص.

** ثالثا فى مجال الدراسة و التعليم:
– بنشوف العلاقة بين المدرس و التلميذ بتتأثر بشكل كبير جدا بتأثير الهالة .. و ممكن تبقى خطيرة و ضارة جدا فى حالات زى الطلبة اللى شكلهم غير جذاب أو بيتلعثموا فى الكلام أو غير نشيطين, المدرس فى الغالب بياخد انطباع سلبى عنهم انهم أغبياء أو غير مؤدبين أو غير مجتهدين و بيعاملهم على هذا الأساس و ده طبعا بيأثر عليهم نفسيا و دراسيا.

** رابعا فى مجال العمل و الوظيفة:
– فى الانترفيوهات دايما بيفرق جدا الانطباع الأول عن المتقدم للوظيفة من شكله و لبسه و أسلوب كلامه و لباقته و صاحب العمل بيتأثر بشكل كبير بالصفات الخارجية دى فى حكمه على الشخص و اتخاذ قرار تعيينه من عدمه.
– برضو فى مجال العمل ساعات المديرين فى تقييمهم للموظفين بيعتقدوا ان الموظف لو مش كويس فى حاجة معينة (زى المواعيد مثلا بيتأخر كتير أو مش بيسلم الحاجة المطلوبة منه فى معادها), يبقى مش كويس فى باقى الحاجات (يبقى مهمل و مش بتاع شغل) وده خطأ كبير لأن مافيش حد كامل و ممكن اللى بيتأخر ده يكون مهتم بالشغل جدا بس بيحب يتقن الحاجة و مابيحبش يكروت.

** خامسا بالنسبة للشركات و الماركات و العلامات التجارية:
– الناس دايما بتحب الماركات و العلامات التجارية المشهورة و بتنجذب ليها دايما و بتثق فى منتجاتها, مع ان ممكن يكون فى منتجات تانية أفضل بكتير و أرخص .. بس ده تأثير الهالة المحيطة بالعلامة التجارية و اللوجو بتاعها على المنتجات أهم من أى حاجة تانى.

_____________________________________

طاب ازاى أقدر أستفيد من معرفتى بتأثير الهالة ده فى حياتى:

* سوّق نفسك:
من غير تفاصيل كتير .. بس ببساطة كده اهتم بنفسك عشان تقدر تصنع انطباع أول جيد عنك عند الناس اللى بتقابلهم .. النظافة و اللبس و اللباقة فى الكلام و اتكلم بحماس و عاطفة عن الحاجة اللى بتحبها.

* سوّق منتجك أو شركتك:
اهتم بمنتجاتك (أو الخدمة اللى بتقدمها) و جودتها عشان الناس لما بتجرب منتجك أو تستريح فى التعامل معاك هاتثق فيك و هتاخد منك أى منتج جديد تانى تعمله أو خدمة جديدة بتقدمها تحت تأثير الهالة اللى انت عملتها لشغلك و لنفسك عند الناس.

* و أخيرا وعيك بالظاهرة أكيد هايخليك أقل تأثرا بجوانبها السلبية و أكثر تفهما للشخص اللى بتتعامل معاه .. ببساطة أحسن الظن بالناس إلى أن يثبت العكس .. لكن ما تعممش حكمك لما يكون المظهر سلبى و التمس الأعذار للناس إلى أن يثبت العكس برضو.

اسف جدا على الإطالة و شكرا

لقراءة الحلقات السابقة و متابعة الحلقات القادمة برجاء الدخول على ايفنت الحلقات “تجارب نفسية” من هنا
www.facebook.com/events/205649423128906/

ماهو تعبيرك ؟

جذاب جذاب
0
جذاب
عبقري عبقري
0
عبقري
مضحك مضحك
0
مضحك
رومانسي رومانسي
0
رومانسي
مذهل مذهل
0
مذهل
محير محير
0
محير
فشل فشل
0
فشل
غضب غضب
0
غضب
جمال فرج عبدالناصر

مصمم ومطور مواقع, مؤسس موقع عالم تانى
تستطيع التواصل معى عبر الشبكات الأجتماعية

التعليقات [عنوان التعليق] 0

تجارب نفسية #6 – تأثير الهالة الشخصية

اختر نوع المقال
Personality quiz
Series of questions that intends to reveal something about the personality
Trivia quiz
Series of questions with right and wrong answers that intends to check knowledge
Poll
Voting to make decisions or determine opinions
Story
Formatted Text with Embeds and Visuals
List
The Classic Internet Listicles
Countdown
The Classic Internet Countdowns
Open List
Submit your own item and vote up for the best submission
Ranked List
Upvote or downvote to decide the best list item
Meme
Upload your own images to make custom memes
Video
Youtube, Vimeo or Vine Embeds
Audio
Soundcloud or Mixcloud Embeds
Image
Photo or GIF
Gif
GIF format
شكرا للمشاركة